Noiz hasi zineten mugitzen?

Duela bi urte zenbait guraso ehundaka sinadura jaso zituzten, sinadura hauek udaletxean aurkeztu zituzten haurtza- indegi euskalduna eskatuz baina udalak ez zuen deus egin.
Pasaden urtean zenbait gurasok eskaera hau bera egin zieten baina erantzunik ez. Arazoaren larritasuna zein zen ikusita, Burlatan 600 haur inguru baitaude haurtzaindegira joateko adinean, lan egiteko jende gehiagoren beharra ikusi genuen. Hau dela eta, bai kalean bai prentsan publiko egin genuen gure helburua eta jendea lortu genuen.

Zenbat zaudete?

Dagoeneko, 43 haur ditugu gure zerrendetan, beraz kopuru majoa dugu baina uste dugu oraindik badirela haur gehiago euskaraz ikasteko prest daudenak. Gurasook lan taldeak sortu ditugu baina ezin dut guraso kopuru zehatza eman.

Zer da orain arte egin duzuena?

Orain arte bai modu pertsonalean baita bateratuan instantziak sartu ditugu udaletxean, baina udalak Nafarroako gizarte ongizatera bidali gintuen haiek ezin zutela ezer egin esanez. Guk horra jo genuen eta hauek esan ziguten udalaren esku zegoela Burlatan haurtzaindegi publiko euskalduna jartzearena eta haiek, hau da,udalak konpondu beharko lukeela arazoa.
Burlatako udaleko alderdi politiko guztiei bai hezkuntza bilera berezia baita haiekin modu pertsonalean biltzeko eskaera egin genien.

Zer da zuen ustez Burlatako udalak egin dezakeena?

Guk uste dugu Burlatako udalak nahi izanez gero arazo hau konpon dezakeela. Ez dugu ahaztu behar gaur egun ez dagoela Nafarroako gobernuarena den haurtzaindegi publiko euskaldun bat ere, eta dauden guztiak udal desberdinenak direla. Honekin batera aipatu beharra dago, gaur egun Burlatan dagoen haurtzaindegi publikoak herriaren % 30ren beharrak asetzen dituela.

Eskatzen duzuen Haur Eskola elebitan nahi duzue? Euskaraz jadanik? Ba al duzue nolabaiteko plangintzarik?

Oraindik ez dugu plangintza berezirik egin, dena den Ermitaberri ikastetxea txikia geratu denez, aipatu dugu behin baino gehiagotan E sektorean egin nahi duten eskolan Ermitaberri zein haur eskola euskaldunerako izan zitekeela. Dena den hau egin arte beste leku bat bilatu beharko luketela uste dugu, gehiegi luzatuko bailitzateke kontua.

Nolakoa da gaur egun Burlatan dagoen haur eskolen eskaintza? Egon al zarete egungo langileekin?

Hiru dira Burlatan dauden haur eskolak, bi pribatu, hauetako bat elebiduna, eta aipatu bezala publiko bat ume gutxi hartzen dituena eta euskara erabat baztertua duena.

Hemendik aitzinera zer?

Espero dugu nahiz eta datorren ikasturterako ez izan hurrengorako zerbait lortzea, dena den badakigu hau ez dela egun batetik bestera lortzen, Beraz aurrera jarraituko dugu haur gehiago lortuz eta Udalean zein Nafarroako gobernuan eskaera eginez.