Pausoz pauso, apurka-apurka bideska egiten da eta batzuetan, denboraren poderioz eta konstantziarekin bidea sortzen da.

PUEBLA DE SANABRIATIK SANTIAGORAT
Camino Mozárabe edo Vía de la Plata izena hartzen duen bidearen azken luzapenak izanen dugu hau. Bide honek ezezagunak diren aukera bi ematen ditu Santiagorat heltzeko: lehenengoa, Zamorako Granja de Moreruela herritik Astorgara abiatzen da eta Frantziar Bidearekin bat egiten du Astorgan, eta bigarrena, Puebla de Sanabria eta Ourensetik igarotzen da. Azken hau Camino Sanabres izenarekin ezagutzen da.

Sanabres bidea, hots, Puebla de Sanabria (Zamora) herrian hasi eta Santiagorat (A Coruña) abiatzen da, tartean 260 kilometro, 4 probintzia: Zamora, Ourense, Pontevedra eta A Coruña, tartean 6 aterpe, 10 egun... bide lasaia, ederra, primitiboa dugu... bidean hamaika gauza naturaz eta inguruneaz gozatzeko, baita ere zamorar eta gailegoen solasaldietaz.

Honako bide hau deskribatzea, azaltzea oso zaila suertatzen da. Ahaleginak egingo ditugu... begiak ixtea lehendabiziko pausoa izanen da, bigarrenik bidean nagoela pentsatzea, hirugarrenik ibiltzen hastea... hala bada, goizeko bostetan altxatu behar, gosaldu eta zapatilak jantzi, gezi horiari jarraitu, harrizko iturri ederrak, ur ona eta zaporetsua, “pallozas” lastozko etxe borobilak, atseden txiki bat egin, carballo edo haritzak, gezi horia, milladoiro edo harriz osaturiko mendiskak bidean hil diren pelegrinoen oroigarriak, harri bat gehituko dugu, soroetan “rubia galega” behiak, eguzkia eta beroa, Rias Baixas autobia, errepideak, eguzkia eta beroa, Nicanor Carballo eskultorearen harria, palmera antza duten azak, txakurrak, gezi horia, Requejo ibaia, hamarretakoa, mendiak, txorien kantak, beste atseden txiki bat, aterpea, artoa, Carballoren eskultura-harriak, aterpeak, eliza romanikoak, gezi horia, eukaliptoak, atsedena hartu, bazkaldu,
Támega ibaia, pinuak, mahastiak, txakurrak, toxo edo haginak, pulpo eta riveiroa, errepidea, erromatar zubiak, lo kuluxka, Miño ibaia, Galiziako salda gozoa, As Burgas edo erromatar jatorria duten termal-iturriak Ourensen, pelegrino-ospitala, Santa Luciako ermita, gaueko bederatzietan afaldu, gezi horia, latsarri publikoak, aterpea bilatu, Oseirako momasterioa, herri-arkitektura, Ulla ibaia, harrizko iturriak, ur freskoa, zelaiak, txorien kantak, gaueko hamar eta erdirako lokartu, gezi horia, pazo edo Galiziako jauretxeak, gezi horia, artoa eta garaiak, Mazarelos atea eta goian Santiagoko Obradoiro plaza eta katedrala. Tamalez eta zorionez, zorionez eta tamalez heldu gara.