Orreaga Fundazioaren
kide eta koordinadorea den Patxi Erdozainek bilgune honen helburu eta
proiektu nagusiak ezezik eguneroko lana eta funtzionamendua nolakoa den
ere azaldu digu.
Orreaga bezalako bilgune bat osatzeko ideia orain dela sei zazpi urte
azaldu zen zortzi hamar lagunen artean dio Patxik. Lagunarte honetan baziren
zenbait erakunde ordezkatzen zituztenak ere eta bilerak Uharteko Berdintasuna
Kultur Elkartean egiten zituzten. Hasiera batean Nafarroan kultur mailan
lanean ari ziren zenbait pertsona eta erakundek, berrogeitabost baino
gehiago, bat etorri ziren ideiarekin. Beharrezkoa ikusten zuten honelako
ekimen bat bultzatzea. Bere gain hartu nahi izan zuten Nafarroako etorkizunaren
erantzunkizuna.
Herri bezala dagokigun
nortasunaren alde lanean ari diren elkarte eta lagunen arteko bilgune
bat osatzea adostu zen, gaur egun ere hala da.
Funtzionamenduari dagokionez biziki garrantzitsuak dira batzarrak. Hauek,
gutxi gora behera, bi hilabetean behin egiten dira. Beti elkarte ezberdinean.
13 / 15 lagun elkartzen ohi gara eta aurrera eraman nahi diren ekitaldietarako
beharrak banatzen ditugu. Elkarte bakoitza ahal duen neurrian inplikatzen
da.
Nafarroa osoko elkarteak parte hartzen dute Orreagan. Tuterako Beterri edo Baigorriko Basaizea elkarteak adibidetzat har ditzakegu. Nahi genuke Euskal Herriko beste elkarte batzuekin ere harremanetan sartzea. Normalean geure ekitaldi zein hausnarketen berri 150 elkartek jasotzen dituzte, posta arrunta zein elektroniko- aren bidez.
Urte hauek guztietan zehar hainbat ekitaldi burutu ditugu: Euskal Herria ezagutzeko ateraldiak, Nafarren Biltzarra (abenduak 3), Erakusketak (Nafarroako Historia, Nafarroako Historiaren Pertsonaiak, Agiri klandestinoak eta azkenengoa Gamazadari buruzkoa), Mus eta Trivial Txapelketak, Euskal Kantuen Liburua, historiari buruzko argitalpenak, triptikoak, e.a.
ORREAGA elkarteen bilgunea izanik logikoa da elkarteen egoera bertan zuzen zuzenean ondorioak izatea. Elkarte batzuk dinamika hagitz aktiboa duten une berean beste batzuk lozorroan dihardute. Elkarte hauek guztien arteko erlazioa oso garrantzitsua da guztien bizitasun kulturala bermatzeko. Zorionez, azken urte hauetan, Axular Kultur Elkartearen egoera biziki aktiboa izan da eta honek eragin positiboa izan du ORREAGA FUNDAZIOAren eguneroko ihardunaldian.
Aunitz dira ORREAGAk bereak egiten dituen erronkak. Hauexek dira garrantzitsuenak:
- Gazteak bereganatu behar ditugu geure proiektuaren partaide izan daitezen. Gure elkarteak zahartzen ari dira eta behar beharrezkoa da zahar eta gazteen arteko kolaborazioa. Azken finean kezka eta ardura berdintsuak ditugu.
- Ezin ditugu begiak itxi inmigrazioaren aurrean. Geure elkarteek integrazio proposamenak bultzatu behar dituztelakoan gaude.
- Geure historiaren ezagutza eta bizi molde berriak uztartu behar ditugu. Nafarroa solidario eta hobe baten alde lan egin behar du
Orreagaren webgunea
ere elkarteen arteko komunikaziorako tresna ezin hobea dugu. Horretarako
behar beharrezkoa da elkarteek beren ekitaldiei buruzko informazioa bidaltzea.
Hauxe da helbidea: www. orreaga.org
Orain arte diru iturririk nagusiena elkarteen diru aportazioak izan dira.
Urtero 20 elkartek 60 _ ematen baitute. Urtean zehar beste zenbait dirulaguntza
ere jasotzen ohi ditugu. Aurten adibidez EAJ eta EA-k kudeatzen duten
Udalbiltzak 6.000 _ eman dizkigute eta Nafarroako Gobernuak (Hizkuntz
Politika) 1.100 _. Vianako Printzipea Instituzioak eta Euskadiko Kutxak
ere batzutan dirulaguntzak onartu dizkigute, aurten aldiz ez.
Dena den, diru kontuetan, geure errekurtso propioak izan beharko geniztuke.
Horretarako ORREAGA FUNDAZIOA sortu genuen. Honelaxe edozeinek diruz lagunduz
gero onura fiskalak izan ditzake.
XXI. mendean ere
amarru zaharra gainean.
Poteretik batzuk (bai Nafarroa bertatik bai kanpotik) geure hizkuntza,
kultura, historia eta ondarea erasotzen duten bitartean espainiako probintzia
batean bilakatu nahi gaituzte. Beste batzuk ordea, eskuzabaltasun osoz,
hainbat erakunderen inguruan lanean ihardute geure historia ezagutaraziz,
geure hizkuntza bultzatuz, geure ondarea eta herria defendatuz, beste
herrienganako elkartasuna bultzatuz. Nafarroa mailan kultur erreferentzia
bilakatu ezezik kultur elkarteen arteko bilgune ere izan behar dugu. Hau
baita gure sorreraren arrazoia. Adibidea, sortu berria den Erriberako
Kultur Elkarteen Koordinadora izan daiteke. Honetan ere burubelarri aritu
baikara. Urtarrilaren 10ean Castejon (Laubide), Tutera (Beterri), Ablitas,
Villafranca eta Murchanteko lagunekin elkartu eta tokian tokiko ezaugarriak
kontutan hartuz ekimen hau aurrera eramateko konpromezua hartu zuten.
ORREAGA-k ere beste zenbait ekimen babesten ditu:
- OINARRIAK bultzatutako bilera zein ekimenetan parte hartzen dugu.
- Jaietan geure kultura present egon dadin “Sanfermin euskalduna” ekimena beste talde batzuekin batera bultzatu dugu.
- Mus Txapelketaren bitartez iaz Nafarroa Oinez diruz lagundu genuen. Aurten berriz Behatokiaren txanda da.
- Elkarteek geure laguntza behar dutenean hantxe gaude: Basaizea (Nafarroaren Eguna), Etxabarrengoa (Orreagako bataila), Nabarralde (noaingo bataila), e.a.
Argibide gehiago nahi izanez gero jo zuen elkartekoengana, AXULAR elkarteak hasiera hasieratik parte hartu baitu ORREAGA proiektuan. Mercaderes 25, 1. pisuan dugu gaur egun egoitza eta bertan gordetzen ditugu herri guztiak ezagutu nahi dituzten erakusketak.
Hauexek dira geure telefono zenbakia eta webgunea: 948 22 00 36 / www.orreaga.org Utzi bertan zuen iradokizun, berri eta ekarpen guztiak.