.Peio Garzia
Testua: Aritz Ibañez
Ermitaberri ikastetxeko zuzendaria: "Bukatu berri dugun obra ez da guk hasieran nahi genuena, baina positibotzat jotzen dugu"
Nos acercamos hasta la escuela pública en euskara de Burlata, Ermitaberri, para charlar con el director del centro de un montón de cosas: edificio nuevo, balance del curso, matriculación, futuro de la ley de calidad, la sana rivalidad con la ikastola Paz de Ziganda... Le hemos preguntado de todo, y Peio Garzia no se ha quedado callado
 Bukatu da ikasturtea eta balantzea egiteko garaia heldu da. Ermitaberrin urte mugitua izan dute. Irailean hasi ziren eraikina zabaltzeko lanak eta maiatzean bukatu ziren. Hasierako eskaerak beste batzuk ziren arren, pozik geratu dira azken emaitzarekin. Honi buruz eta ikastetxean eragina duten beste kontu batzuen gainean solastu gara Peio Garzia, Ermitaberriko zuzendariarekin.

 

 

03-04 Ikasturtea bukatu berritan, zer balorazio egiten duzu?

Balantzea nahiko ona da. Urte positiboa izan da. Ikasturtea, ikastetxean egin ditugun lanek baldintzatu dute. Obra luzea izan da, urte osokoa, irailean hasi eta maiatza bukaera arte iraun du. Zabalkuntza lan hauek eskolarako logikoa den traba suposatu dute. Sei gela berri egin ditugu eta psikomotrizitate gela handi bat. Orotara zazpi, hiru altuera ezberdinetan.
Lan handi eta gogor hau eskola ondo-ondoan egin arren, langileen eta obraren beraren eragina ez da gogorregia izan. Oso ongi egin dute lan, txukunak izan dira, guk esandakoa egiten saiatu dira,... Obra handia zen, baina oso pozik gaude.

Duela denbora gutxira arte modulu aurrefabrikatua zenuten patioan. Orainzabaltze lan hauek bukatuta, aldea somatuko duzue.

Modulua, beste zerbait egin bitartean jarri ziguten patioan. Bi urtez, gure asmoa izan zen, eskola berri bat eraikitzea, eta hortik joan ziren gure eskaerak. Tramite luzeen ondoren, azkenean ez zen eskola berri hori lortu, arrazoi ezberdinak tarteko, eta momentu horretan ikusi genuen aukera eskola honetan bertan beste eremu bat zabaltzeko. Horren truke modulua eraman zuten. Ez da guk hasieran nahi genuen obra, baina egin dena ongi dago eta positibotzat jotzen dugu.

Leku eskaera urtetik urtera igotzen da. Horrela jarraitu ezkero ikastetxe berriaren proiektuari berriz heldu beharko diozue, akaso.

Egun ezin dugu aukerarik baztertu. Obra honekin datozen urteetarako beharrak beteko ditugu.
Baina kontuan hartu beharra dago, aurten, hiru urteko lau gela berri datozela. Gure aurrikuspenetan gehienez hiru gela ziren, baina lau dira. Horrek espazioaren behar handia suposatzen du. Hurrengo ikasturtean lau gela izanda, sartuko gara, baina hurrengoei begira, auskalo! Obra bukatu berritan gaude baina etorkizunean ere pentsatu behar dugu. Matrikula aldakorra da. Azken urteetan gora joan da, baina urte batetik bestera aldatzen da. Horren esperoan gara. Hori bai, orain zabaltzeko aukerak bukatu dira.

Hemendik urte batzuetara Ermitaberri txiki geratuko al da?

Bai. Uste dugu txiki geratuko dela. Gelei dagokienez txiki geratzen ez bada ere, txikia da dagoeneko. Patioa ez da oso zabala, baina gu moldatzen gara. Lanek hobekuntza handia suposatu dute. Gaur egun, inoiz baino hobe gaude. Sekulan ez dugu izan hainbeste toki.
Pozik gaude gaur egun. Txikia geratuko den? Ikusiko dugu, baina ziur aski bai.

Aurtengo aurre-matrikulazio kanpainan D ereduak gora egin du orokorrean. Hemen ere nabaritu duzue gorakada hori?

Bai. Eskola honetan iaz baino 24 haur gehiago matrikulatu dira. Azken urte hauetan, eremuen arabera eta eskaerak ikusita, birmoldaketa bat egiten da: haurrak non daude faltan, non sobera,... Honen ondorioz, beste 15 ikasle etorri zaizkigu, hasieran, hemen aurre-matrikulatu ez baziren ere. 4 gela izanen ditugu, orotara 81 ikasle berri.

PSOEk irabazi zituen martxoko Espainiako hauteskundeak. Hezkuntzari dagokionez, badirudi aldaketak izanen direla, Kalitate Legea delakoa bertan behera utzi dutelako oraingoz. Horrek nola era-giten dizue?
 

Eragiten digu beste askori bezala. Badira zenbait gai puntualak, non Kalitate Legearen eragina oso nabaria da. Arazorik handiena zera da: ez dela erabakitzen legea behin betikoz baztertzen den hala ez. Ez dakigu zuzen irailean zer izanen den indarrean. Zuzendarien izendapena Kalitate Legearen dekretuan oinarrituz egin dute. Gure kasuan ez, izendapena datorren urtean egin behar dugulako, baina beste eskola askotan bai. Erlijioaren gaia ere hor dago, D ereduan eman beharreko gaztelania kopuruaren afera ere bai,... Hori guztia, dekretu batean ala bestean oinarrituz, ezberdina izanen da. Ez dakigu zehazki gauza asko.
Gai hauek ez dute izugarrizko garrantzia eskolaren egunero- kotasunean, baina gauza askotan bai, eta horiek ondorioak ekartzen dituzte gero. Okerrena da gauzak ez daudela batere garbi, garai honetan dena erabakita egon beharko luke. Zain gaude. Hori bai, eta esan dugu, ikastetxearen funtzionamenduan honek guztiak ez du garrantzi handirik, beti bezala jarraituko dugu.

Burlatak haur kopuru mugatua du. Ondoan Paz de Ziganda Ikastola duzue. Nolakoa da bien arteko “konpetentzia”?

Ez dugu bien artean inolako konpetentziarik ikusten. Biak D ereduko eskolak dira, desberdintasuna da Ermitaberri publikoa dela, eta Paz de Ziganda kontzertatua. Guk beste aukera bat bezala ikusten dugu. Gainera, arestian aipatu dugu, hona etorriko diren hiru urteko beste 15 ikasle horiek Paz de Zigandatik datoz. Azken urte hauetan hori gertatu da: han sobera badira hona etortzen dira eta alderantziz. Bien arteko banaketa da, beste aukera bat. Gero gurasoek erabakitzen dute eta hori ona da. Eskaerak bietarako daude, inolako arazorik gabe. Paz de Zigandara kanpoko haurrak ere joaten dira, ez bakarrik burlatarrak. Gureak burlatarrak dira %98an.

Atzerritik etorritako lagunak gero eta gehiago dira gure artean. Burlatan ere gauza bera gertatzen da. Hurbiltzen al dira Ermitaberrira leku bila?

D ereduko ikastetxea gara eta hori atzerritarrentzat oztopoa da. Azken urte hauetan poliki-poliki ari dira sartzen, baina banaka. Aurten berrietan, bi daude kanpotarrak. Asko, edo asko ez badira, gehiago bai, ikasturtean zehar galdezka etortzen dira. Seme-alaba nagusiagoa badute, eta erdalduna bada, anai-arreba txikia ere ikastetxe erdaldunera eramaten dute. Aukera dutenean seme-alaba txikia 2 urterekin hasteko, interesa azaltzen
dute, eta batzuk azkenean, matrikulazioa gauzatzen dute. Kanpotarrak gero eta irekiagoak dira eta gutxika ari dira sartzen. Nafarroa ezagutzen badute, herriko giroa, euskara,... errazago eginen zaie. Gutxi dira oraindik, baina gero eta gehiago.

Bukatzeko, datorren ikasturte- rako aurrikuspen bat egitea eskatuko dizugu.

Datorren ikasturtea ongi ikusten dut. Datorren urtean, aurten izan ez dugun espazioak izanen ditugu: liburutegi on bat, informatika gela on bat, musika gela,... Guzti hori izan dugu aurten, baina beste modu batez. Adibidez, informatika gela izan dugu gainontzeko geletan banatua, ikasleek egin dute, baina ez ditugu izan beste baliabide horiek. Orain askoz hobe egonen gara. Itxaropentsu gara, aukera handiagoak eskainiko dizkiegu ikasleei, gurasoei,...
Haur kopurua ere handitu da. 475 haur inguru izanen ditugu datorren kurtsoan. 500 ikasleetara hurbilduz.