Volgako Batelariak literaturari buruzko aldizkari bat da, ez literatura eta beste zerbait gehiagori buruzkoa. Hausnarketarako eta kritikarako espazio bat izan nahi du, euskal literaturaz eta munduko literaturez hitz egiteko gune bat. Erredakzio batzordea Rikardo Arregi Diaz de Herediak, Ibon Egañak, Juanjo Olasagarrek, Iban Zalduak eta nik neuk osatzen dugu.

Volgako Batelariak izena hautatu dugu euskal aldizkari eta literatur mugimendu askoren izenek ukitu sobietarra zutela ohartuta (Linterna gorria, Lubaki, Vladimir brigadak...), pentsatu genuelako ez zela ideia txarra gureari izen errusiar kutsukoa bai, baina aurresobietarra ematen ahal geniola, popeak eta tsar inperioko zerbait, zirikatzeagatik edo chic iruditzeagatik. Gainera, Volgako Batelariak errusieraz Burlaki na Volge esaten da, eta guk serioski bai baina burlaki, umorez, ere aritu nahi dugu.

Oraingoz, inoizkari kosakoak bost atal ditu, hauek:

-Elkarrizketak atalean literaturarekin edo artearekin zer ikusia duen jendearekin hitz egiten saiatuko gara. Egin den hizkun-tzan eskainiko da elkarrizketa: euskaraz burutu bada, euskaraz; ingelesez izan bada, ingelesez, etab. Orain arte Peio Lizarralderen eta Enrique Vila-Matasen elkarrizketak agertu dira. Laster Gracias por no leer saiakera interesgarria idatzi duen Ugresic idazle kroatarena agertuko da.

-Inoiz idatziko ez nukeena: sekzio honetan, edozein testu onartezin onartuko da, egileak ziurtatuta daukalarik testu hura inoiz ez dela beretzat inoiz, inon, inola, inork aipatua izango. Egileak askatasun osoa du, beraz, bera ez den idazlea izateko, gorroto duen estiloa argi uzteko, antipoetika adibidetzeko, ez dakit zer parodiatzeko, jolaserako, gazte zeneko testu arnegatu eta irakurrezina agertzeko...

-Kritikak atalean liburuen kritikak argitaratuko ditugu, noski. Azken aldiko nobedadeen artean (eta zaharrago batzuen artean ere bai) zenbait aukeratu eta zoriz banatuko ditugu (gutxi gora-behera) VBko idazkuntza-batzordeko partaideen artean.

-Irakurri gabeko liburuen kritikak: egunkarietako eta unibertsitateko kritikoek halakoak egiten badituzte, zergatik ez Volgako Batelariak-ek? Guk, behintzat, abisatzen dugu eta, gainera, ez dugu sosik kobratuko. Edonola ere, ziurtatzen dugu atal honetan agertuko diren liburuak ez ditugula irakurri, eta kritika egiteko bakarrik oinarrituko garela liburuaren kontrazaleko edo hegaleko informazioan, aurkezpen-ekitaldiari buruzko albisteetan, egileari egindako elkarriz-ketetan, beste kritikarien iruzkinetan, etab. Eta, batzuetan, ezta horretan ere.

-Testuak atalean literaturaren inguruko gogoetak, burutazioak, itzulpenak, etab. eskainiko ditugu. Sorkuntza lanak izango dira, baina, oro har, ez-fikziozkoak, aukera hau guztiz baztertzen ez dugun arren.

-Volgako Batelarien ukaseak: erredakzio-batzordearen ohar kolektibo eta jakingarriak plazaratuko ditugu atal honetan, aurkezpen hau bezalako testuak alegia.

Gonbit egiten dizuet Volgako uretara sartzeko, helbide honetan: www.eibar.org/blogak/volga.