Euskal Herria anitza dela denok dakigu, parajeen aldetik, klimaren aldetik eta, noski, euskalkien aldetik ere. Gure modu apalean, Karrikirikideok egitasmo hau abian jarri dugu Euskal Herriko txoko polit eta ez hain ezezagunak ezagutarazteko. Antolaketan aritzen garenok ondorengo urratsak ematen ditugu:

1- Tokia aukeratu. Bakoitzak bere aldetik ikerketa lantxoa egin ondoren, proposamena ekartzen du, eta bileran onartzen dugu.

2- Autobusa kontratatzen da, prezioa kalkulatu ahal izateko.

3- Toki horretan ikusi beharreko tokien zerrenda egin, aukeratu eta gidak lortzen ditugu. Kalkulatzen dugu sarreren prezioak zeintzuk izango diren, eta merketzen dizkigute taldean joateagatik.

4- Kontua borobildua dagoenean, Euskal Herria Irratian eta gure aldizkarian, Karrikan, besteak beste, ateratzen dugu informazioa; kartelak jartzen ditugu zenbait tokitan eta bazkideei posta elektronikoz bidaltzen diegu informazioa.

5- Saiatzen gara tokian tokiko euskara elkarteekin harremanetan jartzen, euskalkiak ezagutu, eta Euskal Herrian euskaraz aritzen den jendea ezagutzeko.

Egitasmoaren beste atal bat Euskal Kultura sustatzearena da, eta Iruñerritik kanpo antolatzen diren antzerki, kontzertu, poesia emanaldi edo beste ekintza kultural batzuetarako ere autobusa antolatzen dugu.
Une honetan eskuartean dugun txangoa Gasteizerako da. Santa Maria katedrala ikusi eta Gasteiztik osteratxoa egingo dugu. Asmoa dugu han bazkaria egin eta arratsalde iluntze partean itzultzeko. Karribus hau azaroaren 26rako antolatu dugu.
Orain arte antolatu ditugunak hauexek dira: Mirandaola parkera, Legazpin; Bilboko Arte Ederretako Museora eta hiria bera ezagutzera; eta Fermin Muguruzaren kontzertura, BEC-en. Izenburuan esan bezala, aukera paregabea: euskaraz mintzatu, euskal kulturaz gozatu eta harremanak euskaraz sendotu. Ez dago gaizki!