Datorren maiatzaren 30ane Axular Elkartearen III. Herri Lasterketa eginen da, eta dagoeneko korrikalari taldekook hasi gara egun horretako zereginekin lanean.

Aurreko bi urteetan lortutako emaitzarekin oso pozik gaude, izan ere, lehendabiziko urtean izandako parte hartzea handia izan bazen ere, bigarrenean handitu egin zen korrikalarien kopurua, Horretaz gain, goiz osoan oso giro polita egon zen.

Aurten ere lasterketaren eskema bera jarraituko dugu, hau da, goiza txiki eta gazteen frogekin hasiko da, eta gero helduen txanda iritsiko da. Lasterketak amaitu ondoren, kategoria bakoitzaren sariak banatuko dira, baina ahaztu gabe lasterketa honetan ez dela saritzen bakarrik lehenengo postuetan ailegatutako korrikalaria, baizik eta korrikalari bakoitzak egindako ahalegina eta lana. Dutxatik pasa ondoren eta izerdia kendu eta gero, elkartean bertan korrikalariek, zein haiek lagundu dituztenek, hamaiketako gozo bat dastatzeko aukera izanen dute. Sabela bete eta eztarria freskatzen den bitartean, pantaila handi batean lasterketan egindako argazkiak egonen dira ikusgai, une honetan ere sailkapenak jakinaraziko dira.

Hala ere, hirugarren edizio honetan berrikuntza batzuk izanen dira. Egitasmoa oraindik gehiago findu behar bada ere, gure asmoa da lasterketaren ekitaldiak arratsaldera arte luzatzea, horretarako arestian aipatutako ekintzen segidan, eguerdian bazkari bat eginen genuke elkartean bertan, gero musika talde baten laguntzaz gorputzak beste modu batez mugitzeko.
Hau guztia zehaztu ahala, informazio guztia www.axularnet.com webgunean plazaratuko dugu. Baten batek, gurekin harremanetan jarri nahi izanez gero, axulararineketan@gmail.com postaren bidez egin dezake.

Bukatu baino lehen, jende guztia animatu nahi dugu lasterketan parte hartzeko. Heldu zein gazte, neska edo mutilak, bertakoak zein kanpokoak, denok zaudete gonbidatuak. Sasoian zaudetenak ez duzue aitzakiarik, eta ohitura ez duzuenok, jada has zaitezkete entrenatzen eta giharrak prestatzen.

.Elkarrizketa

Duela gutxi, herriko neska batzuk elkartu dira goizetan korrika egiteko. Haiengana jo dugu beraien asmoen berri eman diezaguten.

Zer dela eta animatu zarete korrika egiten hastera?
Dena hasi zen Burlatako San Silbestre egunean. Ez genuen pentsatuta korrika egitea, baina bukatu zen haurren lasterketa eta gogoekin geratu egin ginen. Bat hasi zen esaten, "zergatik ez dugu guk parte hartzen, berdin da bukatzen ez badugu, inporta dena giroa da", eta horrela izan zen. Ez genuen uste lasterketa bukatu behar genuenik, baina oso sentipen ona geratu zitzaigun eta hortik atera zen korrika egitearena.
Nortzuk eta noiz biltzen zarete?
Printzipioz lau amatxo gara gelditzen garenak (asteazken eta ostiraletan), Asun, Edurne, Idoia eta Olga, hemendik aurrera Amaia ere animatuko da, berak gainera denbora bat darama korrika egiten. Ordutegi hori oso ongi etortzen zaigu guztioi (haurrak eskolan sartu bezain pronto), gero gure gauzekin jarraitzeko astirik ere badugulako, gainera gutxiago kostatzen zaigu behin kalean egonda eta txandalarekin..

Olgak 10-10:30etatik aurrera egiten du lan, Idoia txandaka dabil lanean, beraz egun batzuetan piper egiten du, Edurne beti arratsaldez dabil lanean, beraz beti elkartzen gara bat edo beste korrika egiteko. Berokiak Axularren uzten ditugu eta bide batez luzaketak han bertan egiten ditugu.
Nolako entrenamenduak egiten dituzue?
Ateraldiak luzeago edo motzagoak egiten ditugu segun eta ze betebehar edo lan egin behar ditugun egun horretan. Korrika egiten gauden denbora guztian hitz eta pitz aritzen gara, horrela errazago suertatzen zaigu eta ez gara hainbeste nekatzen. Olgak dio bera bakarrik atera beharko balitz ez litzatekeela animatuko, eta denak bat gatoz horrekin. Entrenamendua amaitutakoan Elkartera itzultzen gara, berokiak jaso eta berriz ere luzaketa batzuk egiten ditugu. Orokorrean goizeko 10ak baino beranduago ez zaigu inoiz egiten, luzaketak barne.

Ikusiko al zaituztegu Axular Herri Lasteketan?
Ziurrenez Axularreko Herri Lasterketan parte hartuko dugu, 5 km. ongi egiten baititugu, hori bai, lasai. Mota horietako herri lasterketek fisikoki nola gauden ikusteko balio dezakete, animoa igotzeko eta era berean ere gure zaletasuna jai giroan gozatzeko aukera paregabea da.

Orokorrean, egiten dugun moduan eginda, denak oso gustura gaude, bestela arratsaldean egitearena haurrekin okerrago datorkigu, gisa honetan oso erosoa da guretzat. Norbait gehiago animatuz gero, txandala jantzi eta badakizue noiz eta non biltzen garen.